Раҳмоннинг “Толибон” ҳақидаги фикрлари ижобий эмас
У толибларни инклюзив ҳукумат тузилишига қаршилик қилишда айблади.
Афғонистондаги вазият оғирлашиб бораверади. Бу ҳақда Тожикистон президенти Эмомали Раҳмон маълум қилди.
“Ўтган давр мобайнида “Толибон” ҳаракати раҳбарияти дунё ҳамжамияти ва Афғонистон аҳолисига ўз ҳокимияти қонунийлиги, мамлакатдаги вазиятни назорат қила олиш, фуқаролар хавфсизлигини таъминлаш ҳамда ижтимоий-иқтисодий масалаларни ҳал қила олиш салоҳиятини кўрсатиб бера олмади”, – деган Тожикистон етакчиси.
Унинг қўшимча қилишича, толиблар барча сиёсий ва этник кучларнинг кенг иштироки бўлган ҳукумат тузишга қаршилик қилмоқда.
Раҳмоннинг фикрича, Афғонистондаги вазият нафақат Марказий Осиё минтақасига салбий таъсир кўрсатади, балки бутун Евроосиё қитъасидаги геосиёсий мувозанатнинг ўзгаришига олиб келади.
Аввалроқ Марказий Осиё давлатлари раҳбарлари Маслаҳат учрашувида Шавкат Мирзиёев Афғонистон масаласига тўхталиб ўтганди.
