Россия Литвага Калининград вилоятига транзит масаласида ультиматум юборди. Унинг матни ташқи ишлар вазирлиги сайтида эълон қилинган.
“Халқаро ҳуқуқий мажбуриятларини бузишга қаратилган Литва томонининг хатти-ҳаракатларини очиқ душманлик сифатида баҳолаймиз”, – дейилади баёнотда.
Унинг ҳуқуқий асоси сифатида 2002 йилда РФ ва Европа иттифоқининг Калининград вилояти ва Россиянинг қолган ҳудудлари ўртасида транзит тўғрисидаги қўшма баёноти келтирилган.
Ушбу норозилик нотаси тақдим этилиши учун Литванинг вақтинчалик ишончли вакили Виргиния Умбрасен ТИВга чақирилган ва унга кескин протест билдирилган.
Маълумот ўрнида: Литва темирйўллари 18 июндан бошлаб Калининградга ЕИ санкциялари остига тушган товарлар транзити тақиқланиши ҳақида маълум қилди. Шу билан бирга 10 августга қадар ушбу минтақага нефть чекланмаган миқдорда олиб кирилиши мумкин.
Калининград вилояти Россиянинг анклав ҳудуди ҳисобланиб, у РФнинг асосий қисми билан ҳеч қандай қуруқлик чегарасига эга эмас.
Аввалроқ ЕИнинг айрим давлатлари Россия ташқи ишлар вазирининг Сербияга учиб ўтишига рухсат бермай, ўз ҳаво чегараларини ёпиб қўйганди.