Қоидага кўра, жамоат жойларида тиббий ниқобсиз юриш бўйича қоидабузарликлар учун жарима миқдори Маъмурий жавобгарлик тўғрисидаги кодекснинг (МЖтК) 54 моддаси билан белгиланади. Ҳуқуқбузарлар БҲМнинг 5 бараваригача (1 миллион 350 минг сўм) жаримага тортилиши кўзда тутилган.
COVID-19 нинг янги штамми кириб келиши муносабати билан карантин қоидаларига риоя қилинишини назорат қилиш бўйича ИИВ томонидан белгиланган тартибдаги назорат чоралари, яъни фуқароларни тиббий ниқобда бўлишларини назорат қилиш, савдо ва жамоат тадбирлари бўладиган жойларда карантин қоидаларига риоя этишларини назорат қилиб борилади.
Самарқанд вилоят ички ишлар бошқармаси ахборот хизмати раҳбари Жаҳонгир Сағдуллаев айни кунларда вилоятда ИИБ ходимлари томонидан ниқоб тақмаган фуқароларга тушунтириш ишлари олиб борилаётганини маълум қилди.
“Ниқоб тақмаган фуқароларга тегишли қоидалар батафсил тушунтирилгач, расман огоҳлантирилади. Аммо шундан кейин ҳам яна айнан ўша фуқаро тиббий ниқоб тақмаган ҳолда қайд этилса жарима қўллашга мажбур бўламиз”, дейди Ж.Сағдуллаев.
Маълумот учун: 9 январь куни COVID-19 га қарши кураш бўйича махсус комиссия карантин чораларини кучайтириш тўғрисида қарор қабул қилди. Барча ташкилотларга ходимларни фақат эмланганидан кейин иш жойига киритишга рухсат берилади.
Давлат органларига ҳар қандай тадбир ўтказиш тақиқланади. Аҳолини тўлиқ эмлаш жараёни жадаллаштирилади.
Эслатиб ўтамиз, аввалроқ Тошкент шаҳрининг 12 та туманида махсус COVID поликлиникалари иш бошлаши ҳамда коронавирусга қарши вакцинанинг 2022 йилги партияси олиб келингани ҳақида хабар берилганди.
Чўлпоной Аҳмедова