Шавкат Мирзиёевнинг Қатарга ташрифи якунланди
Президентни Қатар ташқи ишлар вазири кузатиб қўйган.
Ўзбекистон Республикаси Президенти Шавкат Мирзиёев Қатарга давлат ташрифини якунлади.
Шайх Ҳамад номидаги халқаро аэропортда Олий мартабали меҳмонни Қатар ташқи ишлар давлат вазири Муҳаммад бин Абдулазиз ал-Ҳулайфий ва бошқа расмий шахслар кузатиб қўйди. Давлат раҳбари Тошкентга жўнаб кетди.
Бугун Доҳада мамлакат етакчиси Амир шайх Тамим бин Ҳамад Ол Соний билан музокара ўтказди. Унда икки мамлакат ўртасидаги ҳамкорликни янада юқори, стратегик шериклик даражасига олиб чиқишга қатъий интилиш билдирилди.
Музокаралар якунида салмоқли ҳужжатлар тўплами имзоланди.
Шунингдек, Президент “ЭКСПО Доҳа - 2023” бутунжаҳон кўргазмасининг очилишида иштирок этди ва бошқа таклиф этилган етакчилар билан биргаликда кўргазмани кўздан кечирди.
Ташриф чоғида давлат раҳбари Қатарнинг йирик инвесторлари билан қатор учрашувлар ҳам ўтказди.
