Шимолий Македониянинг Коçани шаҳрида бўлиб ўтган концертда ёнғин чиқиши натижасида камида 50 киши ҳалок бўлди. Маҳаллий «Вечер» нашрининг хабар беришича, фожиа тунги клубда содир бўлган ва ёнғин пиротехника воситалари сабаб юзага келган бўлиши мумкин.
Дастлабки маълумотларга кўра, концерт ўтказилган клубнинг эгаси қўлга олинган. Шунингдек, Шимолий Македония Ички ишлар вазирлиги тадбир ташкилотчиларини сўроққа чақирган.
Гувоҳларнинг сўзларига кўра, ёнғин тез тарқалган ва кўпчилик залдан чиқишга улгурмаган. Ҳозирда расмийлар ҳодисанинг аниқ сабаблари ва жабрланганлар сонини аниқлаш устида иш олиб бормоқда. Ёнғин оқибатида кўплаб инсонлар жароҳатланган, уларнинг айримлари оғир аҳволда касалхонага ётқизилган.
Расмийлар воқеа жойида тергов ҳаракатларини олиб бораётган бўлиб, фожиа юзасидан қўшимча маълумот берилиши кутилмоқда.