Тадбиркорларга 11,5 миллиард сўмлик "снос" пуллари тўлаб берилди
Маълумки, жорий йилнинг 20 август куни Президент Шавкат Мирзиёев тадбиркорлар билан илк бор очиқ мулоқот ўтказгани ва унда тадбиркорлардан давлат ва жамоат эҳтиёжлари учун олиб қўйилган мулклар зарарини маҳаллий ҳокимликлар тўлиқ қоплаб бериши айтилганди.
Шу боис, Президент фармойиши ижроси ва тадбиркорларнинг ер масалалари билан боғлиқ мурожаатларини ҳал этиш бўйича Қашқадарё вилоятида бир қатор амалий ишлар бажарилди.
Жумладан, жорий йилнинг август-сентябрь ойлари давомида вилоят бўйича 70 та тадбиркорлик субъектига нотурар объектлари зарарини қоплаш учун 11 миллиард 527,4 миллион сўм маблағ тўлаб берилди.
Маълумотларга асосан, ер участкаларига оид тадбиркорларга етказилган зарарларни тўлаб беришда энг кўп ҳолат Муборак туманида қайд этилган. Мазкур туманда 34 та нотурар объект учун 3 миллиард 56.6 миллион сўм ажратилган.
Иккинчи ва учинчи ўринларда Қарши шаҳри (2182,2 миллион) ва Чироқчи тумани (2011,9 миллион) қайд этилди.
Бундан аввал ҳокимликларнинг “снос”лар бўйича тадбиркорлардан 123 миллиард сўм қарзи борлиги, 1 сентябргача ҳамма қарзлар қайтарилиши шартлиги ҳақида хабар берилганди.
Чўлпоной Аҳмедова
