"Толибон" Хитой ва Покистонга элчи тайинламоқчи
"Толибон" ҳокимиятини тан олган давлатларга элчиларини жўнатади. Бу ҳақда ҳаракат расмий вакили Забиҳулло Мужоҳид маълум қилди.
Хитой ва Покистонга қачон элчи тайинланиши ҳақидаги саволга: "Бизни тан олишгандан сўнг, элчиларимизни юборамиз. Умид қиламанки, бу тез орада содир бўлади", — деб жавоб берган.
Янги ҳукумат, шунингдек, Россия томонидан тан олинган тақдирда Москвадаги миссия раҳбари ҳам ўзгаради.
"Россиянинг Кобулдаги элчиси билан яхши муносабатдамиз. Биз икки давлат ўртасида аъло дипломатик ва сиёсий алоқалар бўлишини истаймиз", — деган расмий вакил.
Ҳозирда Афғонистоннинг юзлаб элчиларининг кейинги тақдири номаълумлигича қолмоқда. Уларнинг аксарияти ўзи ишлаётган давлатдан сиёсий бошпана сўраган.
Аввалроқ, "Толибон" БМТда янги вакил тайинлагани хабар қилинганди.
Жаҳонгир Қўзиев
