“Толибон”ча сўз эркинлиги. Афғонистонда юздан ортиқ ОАВ фаолияти тўхтаган
Толиблар ҳокимиятни эгаллагандан кейин 150 та оммавий ахборот воситаси ёпилган. Ҳаракатнинг журналистлар фаолиятига тўсқинлик қилмасликка берган ваъдасига қарамай, улар “Толибон”га ҳамон ишончсизлик билан қарамоқда.
“TOLO News”нинг маълум қилишича, ОАВ ёпилишига асосий сабаб - молиявий қийинчиликлар ва толиблар қўяётган чекловлар. Афғон Миллий журналистлари иттифоқи вакили Масрур Лутфий қайд этганидек, агар халқаро ташкилотлар бунинг олдини олмаса, “тез орада матбуот эркинлиги ва бошқа фуқаровий эркинликлар бутунлай барҳам топади”.
Фаолиятини якунлаган ОАВлардан бири “Inakas” телеканали. Бу канал мамлакатнинг 3 вилоятига кўрсатув узатади. Аммо айрим компаниялар рекламага пул тўлашни тўхтатиши ортидан каналда молиявий муаммолар пайдо бўлди. Шундан кейин “Inakas” ёпилган.
Аввалроқ “NDTV “ нашри мамлакатнинг энг йирик ОАВларидан бўлган “TOLO News” тақдири ҳақида мақола эълон қилган. Унда телеканал вакиллари толибларга нисбатан ишонч паст эканлигини айтган.
“Толибон”га қарши турли шаҳарларда намойишлар бошланиб кетгач, ҳаракат бу воқеаларни журналистларга ёритишни тақиқлаган. Бундан ташқари бир неча ОАВ ходимлари калтакланган. Хусусан, ўтган ойда айнан “TOLO News” мухбири толиблар томонидан жазоланган эди. Шунингдек, “Толибон” ҳокимиятни эгаллагандан кейин интервью олган журналист аёл мамлакатдан чиқиб кетган.
Жаҳонгир Қўзиев
