“Толибон” ТАПИ газ қувури қурилишига кўмаклашишга ваъда берди. Бу ҳақда The Express Tribune хабар берди.
“Толибон”нинг йирик раҳбарларидан бири, Афғонистон мудофаа вазири вазифасини бажарувчи мулла Муҳаммад Ёқуб ТАПИни қўллаб-қувватлашини маълум қилди.
“Мен ТАПИ миллий лойиҳаси хавфсизлиги учун тўғридан-тўғри жавоб бераман. Унинг амалга оширилиши учун биз ҳар қандай қурбонлар беришга тайёрмиз”, – деган мулла Ёқуб.
ТАПИ – Туркманистонни газини Афғонистон орқали Покистон ва Ҳиндистонга етказиб берадиган йирик газ қувури. Ушбу лойиҳани амалга ошириш 2015 йилдан бошланган. Унинг умумий қиймати 10 миллиард долларни ташкил этади. Газ қувури умумий узунлиги 1814 километр. Маълумотларга кўра, афғонистон бу лойиҳа амалга ошса, йилига 500 миллион доллар фойда олади.
Аввалроқ Туркманистон президенти ТАПИ лойиҳасини амалга оширилиши Афғонистонга катта фойда келтиришини маълум қилганди. Шунингдек, Ўзбекистон ва Россия темирйўлчилари трансафғон темирйўли қурилиши устида биргаликда иш бошлагани хабар қилинганди.
Жаҳонгир Қўзиев