Тошкентда такси ҳайдовчиси уч нафар аёлга шилқимлик қилди

Мазкур ҳолат юзасидан Тошкент шаҳар ИИББ маълумот берди. 

Унда айтилишича, “Мatiz” русумли автомобиль (давлат рақами 10 Й 518 СA) ҳайдовчиси — Жаҳонгир Т. томонидан ҳуқуқбузарлик содир этилгани тўғрисида Тошкент шаҳар ИИББга ариза келиб тушмаган. Идора ходимлари юқоридаги эълон муаллифи билан боғланиб, жабрланувчилар ҳақида маълумот олгандан сўнг, аёлларга ёзма равишда ички ишлар органларига мурожаат қилиш зарурлиги тушунтирилди. Шу  йилнинг 17 сентябр куни икки нафар жабрланувчилар — Э.М. ва Т.Ю.лар Миробод тумани ИИО ФМБга мурожаат қилишди. Учинчи қиз — М.С. ҳам яқин орада ариза ёзишга тайёрлигини билдирди.

Мазкур ҳолат бўйича тергов олди текширувлари олиб борилмоқда.

“Ҳурматли ҳамшаҳарлар ва Тошкент меҳмонлари! Агар сиз ва яқинларингиз ножўя ҳатти-ҳаракат қилган такси ҳайдовчиларига дуч келсангиз, ички ишлар органларига мурожаат қилинг. Бу нафақат сизга, балки жамиятга ҳам фойда бўлади”, — дейилади ИИББ хабарида.

Эслатиб ўтамиз, аввалроқ Чилонзорда такси ҳайдовчиси машинага чиққан қизга зўравонлик қилгани ҳақида хабар берилганди.

Баҳринисо Мадумарова