Тунис собиқ бош вазири 34 йилга қамалди
У терроризмга оид ишда айбдор деб топилган.
Тунисда собиқ бош вазир Али Лораэд терроризмга оид айбловлар бўйича 34 йилга озодликдан маҳрум этилди. Али Лораэд 2011–2013 йилларда ички ишлар вазири, 2013–2014 йилларда эса бош вазир лавозимида ишлаган, шунингдек, у «Ан-Наҳда» партиясининг етакчиларидан бири ҳисобланади. Суд ҳукмига кўра, у жангариларни Тунис ташқарисидаги можароли ҳудудларга юбориш билан боғлиқ ишда айбдор деб топилган.
Али Лораэд 2022 йилдан бери ҳибсда сақланмоқда. Шу иш доирасида яна 7 киши 18 йилдан 36 йилгача қамоқ жазосига ҳукм қилинган. 2024 йил февраль ойида эса "Ан-Наҳда" партияси раҳбари ва собиқ парламент спикери, 83 ёшли Рошид ал-Ганнуший ҳам 22 йил қамоқ жазосини олган эди.
Маълумот учун, 2021 йилда Тунисда ҳаёт даражаси кескин ёмонлашганидан сўнг оммавий норозиликлар юз берган, президент Қайс Сайид парламентни тарқатиб, ҳукуматни истеъфога чиқарган эди. Кейинчалик референдумда янги конституция қабул қилиниб, президент ваколатлари кенгайтирилди. Танқидчилар бу жараённи демократиядан чекиниш деб баҳоламоқда.
