Туркия Украина ва Грузиянинг НАТОга интилишини қўллаб-қувватлади
Туркия Грузия ва Украинани НАТОга қабул қилинишини қўллаб-қувватлашини маълум қилди. Туркия ташқи ишлар вазири Мавлуд Чавушўғлу ана шундай фикр билдирган.
“Биз Украина ҳудудий яхлитлигини қўллаб-қувватлаймиз ва Қрим аннексиясини тан олмаймиз. Фикримча, Украина ва Грузиянинг НАТОга интилишини қўллаб-қувватлаш зарур”, –– деган Чавушўғлу. Шу билан бирга бу Туркиянинг Россия билан муносабатларига таъсир қилмаслигини қайд этган. “Биз Россия билан мулоқотдамиз. Президент (Эрдўған) россиялик ҳамкасби билан яхши алоқаларга эга. Бизнинг сиёсатимиз очиқ”, –– деган вазир.
Туркия бошқа НАТО давлатлари каби Қримнинг Россия таркибига қўшиб олинишини тан олмайди. Анқара Қримни Украинага тегишли деб ҳисоблайди.
Бундан аввал Европа Иттифоқи Украинада ҳарбий миссия очмоқчи эканлиги ҳамда НАТО бош котиби Россия билан мулоқот муҳим эканини айтгани хабар қилинганди.
Жаҳонгир Қўзиев
