Учтепа туманида куппа-кундузи ўғирлик содир этилди
Жорий йилнинг 24 сентябрь куни соат 15-30да Учтепа туманида номаълум шахс 36 ёшли Д. Д. га тегишли бўлган олти миллион беш юз сўмлик велосипедни ўғирлаб кетди. Бу ҳақда Тошкент шаҳар ИИБ матбуот хизмати Нилуфар Исаханова Zamon.uz'га маълум қилди.
Мазкур ҳолат юзасидан Д.Д. Учтепа тумани ички ишлар бўлимига ариза билан мурожаат қилган. Унинг мурожаати асосида Ўзбекистон Республикаси Жиноят кодексининг 169-моддаси, яъни ўғирлик аломатлари билан жиноят иши қўзғатилди. Кўрилган тезкор тадбирлар натижасида ўғирлик содир этишда гумонланувчи 38 ёшли А.Ю. қўлга олинди.
Ҳозирда тергов-суриштирув ҳаракатлари олиб борилмоқда.
Эслатиб ўтамиз, бундан аввалроқ Тошкентда 3 нафар номаълум шахс дорихона сотувчисига пичоқ билан таҳдид қилиб, 15 миллион сўмни ўмариб кетгани ҳақида хабар берилган эди.
Муножат Валиева
