Ушбу хабарга ойдинлик киритиш мақсадида Акциядорлик тижорат Халқ банки матбуот хизмати раҳбари Юнус Бўронов билан боғландик.
Банк вакили Акциядорлик тижорат Халқ банкида тижорат кредитлари бериш вақтинча тўхтатилганини тасдиқлади. Аммо яқин кунларда қайтган маблағлар ҳисобидан ушбу кредитларни бериш йўлга қўйилишини маълум қилди.
—Мижозлар томонидан айнан қайси йўналишдаги кредитлар қайтарилмаяпти?
— Ҳам жисмоний, ҳам юридик шахсларга ажратилган кредитларнинг қайтарилишида жиддий муаммо юзага келмоқда. Дейлик, баъзи ҳудудларда жисмоний шахсларга ажратилган кредитларнинг қайтарилишида муаммо юзага келаётган бўлса, бошқа ҳудудларда юридик шахсларга берилган кредитлар ўз вақтида қайтарилмаяпти. Айниқса, Тошкент шаҳрида муаммоли кредитлар салмоғи бир мунча ошган.
Шунингдек, Халқ банки ижтимоий йўналишлар, чорвачиликни ривожлантириш, “Ҳар бир оила тадбиркор”, Аёллар тадбиркорлиги, “Ёшлар келажагимиз” каби Давлат дастурлари доирасида ажратган кредитларнинг ҳам катта қисми муммоли кредитларга айланган. Маълумот ўрнида айтишим мумкинки, ушбу дастурлар доирасида аҳолига имтиёзли кредит Марказий банкнинг қайта молиялаш ставкаси (14 фоиз ) даражасида берилмоқда. Энг катта муаммо ижтимоий дастурларга ажратилган кредитларда бўляпти. Лекин ушбу Давлат дастурлари бўйича кредитлар ажратилиши тўхтатилгани йўқ. Тижорат кредитларини ҳам Халқ банкининг ҳар бир филиалида қайтган кредитлар ҳисобига олиш мумкин.
—Бу борада қандай чора-тадбирлар кўриляпти?
—Айни пайтда Ҳукумат топшириғига кўра, Халқ банкини қисқа муддатларда соғломлаштириш чоралари кўрилмоқда. Бу масалада Молия вазирлиги ва Марказий банк билан йил охирига қадар амалга ошириладиган шошилинч чоралар-тадбирлар ишлаб чиқилмоқда.
Эслатиб ўтамиз, банкнинг 2021 йил 1 июль ҳолатига кредит портфелидаги муаммоли кредитлар қолдиғи 15 фоизга етган: 3 триллион 200 миллиард сўмдан ошган.
Муножат Валиева