Маълум қилинишича, 2021 йил 27 август куни соат 17:20 ларда вилоят ИИБнинг 102 Call-маркази оператори Урганч тумани, Чоткўпир қишлоғи, «Орзу» маҳалласида номаълум уч нафар фуқаро канализация қувури ичига тушиб кетиб, вафот этгани ҳақида хабар келиб тушган.

 

Қайд этилишича, фуқаролар Х.Ш., О.К. ва Ш.К. Урганч тумани, Чоткўпир қишлоғи, «Орзу» маҳалласи ҳудудидаги кўп қаватли уйлардан чиққан канализация сувларини ҳайдаб чиқариш учун мўлжалланган канализация камерасига тушишганида, камера ичида тўпланиб қолган заҳарли газдан заҳарланиб, ҳодиса жойида вафот этган.

 

Мазкур ҳолат юзасидан Урганч тумани ИИБ ҳузуридаги тергов бўлими томонидан 2021 йил 27 августда Жиноят кодексининг 257-моддаси 2-қисми «а» банди (одам ўлишига сабаб бўлган меҳнатни муҳофаза қилиш қоидаларини бузиш) билан жиноят иши қўзғатилган.

 

Ушбу жиноят иши вилоят ИИБ ҳузуридаги тергов бошқармаси терговчилари иш юритувига ўтказилиб, вилоят прокуратураси томонидан назоратга олинган.

 

Ҳозирда дастлабки тергов ҳаракатлари олиб борилмоқда.