Яккабоғда хотинини ваҳшийларча ўлдирган эркакка ҳукм ўқилди
У собиқ турмуш ўртоғининг кўзини ўйиб, юрагига пичоқ санчиб ўлдирган.
Қашқадарё вилояти Яккабоғ туманидаги «Уйғур» маҳалласида ўтган йилнинг 21 октябрида фуқаро У.Э. маст ҳолда турмуш ўртоғи Г.Ҳ. билан жанжаллашиб, уни бир неча бор уриб, ўлдириб қўйган эркакка суд ҳукми ўқилди.
Хабар берилишича, судланувчи У.Э.га Жиноят кодекси 97-моддаси 1-қисми билан 13 йил муддатга озодликдан маҳрум қилиш жазоси тайинланган.
«Ҳаммадан кечирим сўрайман, Президентимдан кечирим сўрайман биринчи ўринда. Мен бу уришимда ўлиб қолади, деб ўйламаганман. Бундай ниятим ҳам бўлмаган», — деган эркак.
Лекин Марҳуманинг отаси К.Ҳ.нинг сўзларига кўра, куёви «қизини ваҳшиёна тарзда уриб ўлдирган — бошига қаттиқ жисм билан уриб, бош суяклари ва бурнини синдирган, кўзини ўйиб олган, юрак қисмига пичоқ санчиб, қийнаб, қизининг ҳаётига нуқта қўйган. Бунга асоси ҳам борлигини айтиб ўтди.
Эслатиб ўтамиз, ҳодиса юзасидан Жиноят кодексининг 97-моддаси (қасддан одам ўлдириш) аломатлари билан иш очилган, гумонланувчи У.Э. қамоққа олинган. Бу ҳақда вилоят прокуратураси орадан бир ой ўтиб, 22 ноябрь куни — «Дарё» сўровидан сўнг ахборот берган.
