Йўловчига қўпол муносабатда бўлган автобус ҳайдовчисига чора кўрилди
Ижтимоий тармоқларда автобус ҳайдовчиси йўловчи аёлга нисбатан қўполлик қилгани акс этган видеохабар тарқалди. Маълум бўлишича, жорий йилнинг 25 сентябрь куни соат 15:30 да ҳайдовчи “Машинaсозлар” бекатида кўп вақт туриб қолгани учун аёл бунга эътироз билдирган. Натижада, ҳайдовчи ва йўловчи орасида низо келиб чиққан.
Мазкур ҳолат юзасидан тезкор суриштирув ишлари ўтказилганда, ушбу автобус Тошкент шаҳрида йўловчи ташиш фаолияти билан шуғулланувчи “Автосантранс-сервис” МЧЖга бириктирлган, давлат рақами 01/035ҚБА бўлган, 155-сонли йўналишда ҳаракатланувчи “ISUZU” русумли автобус ҳайдовчиси O.Ш экани аниқланди.
Аниқланишича, ҳайдовчиси ўз хизмат вазифаси давомида йўловчини ҳақоратлагани, йўналишда уяли алоқа воситасидан фойдалангани ва тиббий ниқоб тақмагани учун вақтинча вазифасидан четлатилган. Воқеага аниқлик киритилгандан сўнг унинг ҳайдовчиликка лойиқлик масаласи кўриб чиқилган.
Шунингдек, барча ҳайдовчилар билан яна бир бор тушунтириш ишлари олиб борилиб, ҳайдовчилар устидан назорат кучайтирилган.
Юқоридаги каби ҳолатда тез-тез гувоҳ бўламиз. Шу боис оддий ҳолат сифатида қабул қиламиз. Бунга сабаб истеъмолчиларнинг ўз ҳуқуқ ва имкониятларини тўлақонли тушуниб етмасликларидир.
Ҳамюртларимизга шу каби ҳолатларга дуч келган тақдирда “Тошшаҳартрансхизмат” акциядорлик жамиятининг 1062 ишонч рақами ёки info@tashbus.uz электрон манзилига мурожаат қилишлари мумкин.
Аввалроқ, жамоат транспортларидан бир ой мобайнида қанча йўловчи фойдаланганлиги ҳақида хабар берилганди.
Мафтуна Режаббоева тайёрлади.
