Зеленский Россияни огоҳлантирди
Бу Украина ҳудудларини РФ таркибига қўшиб олиниши билан боғлиқ.
Украина президенти мамлакат жанубий вилоятларининг Россияга қўшиб олиниши масаласига изоҳ берди.
"Биз ҳеч нарсани бермаймиз, агарда босқинчилар "референдум" ўтказса, Россияга маълум вақтдан сўнг Украина ва эркин дунё билан зарур бўлган музокаралар имконияти бутунлай тугайди", — деган у миллатга йўллаган видеомурожаатида.
Зеленский ҳозирги босқичда энг муҳими ҳамкорлар томонидан етказиб берилаётган қуроллар эканини маълум қилган.
Россия кучлари Украинанинг Запорожье ва Херсон вилоятларини баҳордан буён назорат қилиб келади. Июнь ойида Херсон вилоятининг ҳарбий-фуқаролик администрацияси раҳбари ўринбосари деб эълон қилинган Кирилл Стремоусов 2022 йил кузида РФ таркибига қўшилиш юзасидан референдум ўтказилишини эълон қилди. Аммо аниқ муддатлар келтирилмаган.
Аввалроқ Зеленский Украинада мусодара қилинган Россия мулклари юзасидан маълумот берганди.
