Toliblar jurnalistni kaltakladi
TOLONews nashri muxbiri toliblar tomonidan kaltaklandi.
Maʼlum bo‘lishicha, jurnalist Ziyor Yad va operator Kobuldagi qashshoqlar va ishsizlik haqida lavha tayyorlash vaqtida toliblar tomonidan kaltaklangan. Ushbu hodisa Kobulning Hoji-Yoqub mavzesida bo‘lib o‘tgan. Toliblar jurnalist telefoni va videokamerasini ham tortib olgan.
Tahririyatning xabar berishicha, bundan avval boshqa hududlarda ham OAV xodimlariga hujumlar kuzatilgan. Ammo oshkor qilinmagan. Ziyor Yad avtomat qo‘ndog‘i bilan kaltaklanganini aytdi.
Parvon viloyati Jurnalistlar assotsiatsiyasi raisi o‘rinbosari Parviz Aminzoda “ ‘Tolibon‘ ning butun mamlakatni nazoratga olgandan keyin muxbirlarga qanday muaomala qilishi xavotir uyg‘otadi”,- deb aytgan.
O‘z navbatida “Tolibon” ning madaniyat qo‘mitasi raisi o‘rinbosari Ahmadulla Vosiq jurnalistlarga tahdid qilinganini, ammo ular kaltaklanmaganini maʼlum qildi. Shuningdek, Vosiq bu hodisaga jiddiy yondashilganligini, surishtiruv ishlari davom etishini taʼkidladi.
Eslatib o‘tamiz bundan avval “Tolibon” OAV muammolarini hal qilish uchun uch tomonlama qo‘mita tuzganligi xabar qilingan edi.
Jahongir Qo‘ziyev
