Turkiya tashqi ishlar vaziri: “Afg‘onistonda inklyuziv hukumat tuzilishi kerak”
Turkiya “Tolibon” hokimiyatini tan olishga shoshilmaydi. Bu haqda mamlakat tashqi ishlar vaziri Mavlud Chavusho‘g‘lu NTV nashriga bergan intervyusida maʼlum qilgan.
Vazirning fikricha, Afg‘onistonda eng avvalo inqirozlarga chidamli va fuqarolar urushining oldini oladigan hukumat tuzilishi kerak.
Buning uchun “barcha siyosiy kuch va aholining turli qatlamlari, xususan ayollarni ham qamrab oladigan” inklyuziv hukumat tuzish zarurligi taʼkidlandi. Chavusho‘g‘lu “Biz kuzatamiz va vaziyatdan kelib chiqib harakat qilamiz. Hozircha aniq pozitsiya yo‘q”, - deb aytgan.
Shuningdek, Turkiya Kobul aeroportini qayta ishga tushirish bo‘yicha Qatar va AQSH bilan hamkorlik qilayotgani maʼlum bo‘ldi. Tashqi ishlar vaziri xalqaro qoidalar asosida parvozlar yo‘lga qo‘yilishi muhimligini qayd etgan. “Eng muhim masala–xavfsizlik. Ammo kim uni taʼminlay oladi? “Tolibon” buni amalga oshirishga ishonadi, lekin aeroportda to‘liq xavfsizlik o‘rnatilmaguncha hech qaysi aviakompaniya parvozlarni boshlamaydi. Biz buni doimiy taʼkidlab kelmoqdamiz”, – degan Chavusho‘g‘lu.
Maʼlumot o‘rnida, 15 avgust kuni “Tolibon” Kobul shahrini egalladi. AQSH harbiylari 31 avgust kuni Afg‘onistonni to‘liq tark etdi. Bu mamlakatdagi AQSHning 20 yillik harbiy ishtirokiga yakun yasadi.
Avvalroq, Jozef Bayden “Tolibon” hokimiyatini tan olmasligini aytgan edi.
Jahongir Qo‘ziyev
