Gruziya bosh vaziri Mixail Saakashvili agar Gruziyaga qaytsa, tezda qamoqqa olinishini aytdi
Qayd etilishicha, Gruziya bosh vaziri Irakliy Garibashvili mamlakatning sobiq prezidenti Mixail Saakashvili Gruziya hududiga qadam qo‘ygan zahoti hibsga olinishini aytdi. Bu haqda “TASS” xabar berdi.
Maʼlum qilinishicha, sobiq prezident 2-oktabr kuni mahalliy saylovlar uchun Gruziyaga qaytmoqchi bo‘lgan.
Garibashvili Mixail Saakashvili to‘g‘risida o‘zining qatʼiy fikrini quyidagicha izohlagan:
“Saakashvili bizning yerimizga, hududimizga qadam bosishi bilan, tezda hibsga olinadi va qamoqqa tashlanadi. Bu jarayonga aralashgan har bir kishi qonun doirasida eng qattiq tarzda jazolanadi”.
Shu bilan birga, u Saakashvilining mamlakatga kelishdan maqsadi hokimiyatni qayta qo‘lga kiritish ekaniga ishonch bildirgan va hozirgi vaziyat 2003-yilda sobiq prezident o‘z sheriklari bilan Gruziyada “atirgul inqilobi”ni uyushtirib, hokimiyatni egallagani kabi emasligini aytgan.
“Saakashvilining yagona vazifasi va maqsadi mamlakatimizda tartibsizliklar, beqarorlik va betartiblikni keltirib chiqarish. Uning yagona istagi esa hokimiyatni qo‘lga olish. Bu Saakashvili va uning jamoasi uchun amalga oshmaydigan orzu. Bugun davlat kuchli, Mixo va uning to‘dasi bu 2003 yil, deb o‘ylamasin. Har kim har qanday provokatsiya uchun qatʼiy javob beradi, albatta, qonun doirasida”, — deya xulosa qilgan Garibashvili .
Maʼlumot o‘rnida: Saakashvili 2-oktabr tunda Tbilisiga uchish uchun samolyot chiptasini sotib olganini aytgan. Keyinchalik tarmoqda chiptaning fotosuratlari paydo bo‘lgan, unda sobiq prezident onasi Giuli Alasaniya bilan Gruziyaga kelishi maʼlum bo‘lgan.
Bundan avval Gruziya hukumati cheklovlarni qayta tiklagani, Bahrom Ashrafxonov O‘zbekistonning Gruziyadagi elchisi bo‘lgani hamda gruziyalik paraatlet Tokiodan badarg‘a qilingani aytilgandi.
Cho‘lponoy Ahmedova
