Yevropa Ittifoqi Avstraliya bilan erkin savdo to‘g‘risidagi muzokaralarni kechiktirdi

 

 

YI va Avstraliya o‘rtasidagi savdo muzokaralarining 12-raundi oktabrda o‘tkazilishi kerak edi. Ammo maʼlumotlarga ko‘ra, baʼzi hal qilinmagan masalalar tufayli ularni hozirda davom ettirib bo‘lmaydi. Shu bilan birga noyabrda muzokaralarni davom ettirish mumkinligi maʼlum qilindi. Ushbu jarayonga yaqin manbalardan biri hodisa aynan fransuz suvosti kemalari bilan bog‘liqligini aytgan.

 

Avstraliya savdo vaziri Den Texan hozirda Yevropada bo‘lib turibdi. Uning taʼkidlashicha, muzokaralar vaqtinchalik qoldirildi,  butunlay bekor qilingani yo‘q. Texan kelgusi hafta Parijga boradi. Ammo uning fransuz hamkasbi Frank Rister bilan uchrashishi  maʼlum emas. Hozirga qadar Fransiya ishbilarmonlari ittifoqi — MEDEF Avstraliya vaziri bilan uchrashuvini bekor qilgan.

 

Maʼlumot o‘rnida: 16-sentabr kuni Avstraliya AQSH va Buyuk Britaniya bilan yangi harbiy alyans –– AUKUS tuzganini eʼlon qildi. Shundan keyin AQSH Kanberraga atom suvosti kemalarini yetkazib berishga vaʼda bergan. Bu Fransiya bilan 56 milliard yevropalik shartnomaning bekor qilinishiga olib keldi. Oqibatda Fransiya AQSH va Avstraliyadagi elchilarini chaqirib olgan.

 

Avvalroq Fransiya YEIning Avstraliya bilan erkin savdo to‘g‘risidagi kelishuviga qarshi chiqqani  va Xitoy yangi harbiy alyans qurollanish poygasini kuchaytirishi haqida bayonot bergani xabar qilingandi.

 

Jahongir Qo'ziyev