O‘zbekiston navbatdagi xalqaro shartnomaga qo‘shildi
Shavkat Mirziyoyevning BMTning Osiyo va Tinch okeani iqtisodiy va ijtimoiy komissiyasining (UNESCAP) “Quruqlik portlari” to‘g‘risidagi hukumatlararo bitimiga qo‘shilishga oid qarori qabul qilindi.
Shartnomaning asosiy maqsadi — Osiyo — Tinch okeani mintaqasida transport tashuvlarini uyg‘unlashtirish va yengillashtirish uchun xalqaro ahamiyatga ega bo‘lgan logistika markazlarini (quruqlik portlarini) qurish va ishlatish bo‘yicha ko‘rsatmalarni ishlab chiqish.
Xalqaro shartnomani amalga oshirish bo‘yicha O‘zbekiston nomidan Transport vazirligi masʼul vakolatli organ etib belgilandi.
Shartnoma O‘zbekiston logistika markazlarining (quruqlik portlarini) xalqaro ahamiyatga ega obyektlar sifatida qabul qilinishi va ro‘yxatga kiritilishi imkonini berishi kutilmoqda.
Maʼlumot uchun, Birlashgan Millatlar Tashkilotining Osiyo va Tinch okeani uchun iqtisodiy va ijtimoiy komissiyasi 1947-yil mart oyida tashkil etilgan. Bosh qarorgohi Bangkokda joylashgan. Komissiya mintaqaviy va subregional hamkorlikni kuchaytirish orqali Osiyo — Tinch okeani mamlakatlarini ijtimoiy-iqtisodiy rivojlanishiga ko‘maklashish uchun ishlab chiqilgan.
Avvalroq O‘zbekiston va Turkmaniston o‘rtasida 23 ta hujjat imzolangandi. Shuningdek, O‘zbekiston va Rossiya bosh prokurorlari o‘rtasida memorandum hamda Farg‘ona viloyati delegatsiyasining Qirg‘izistonga safari davomida ikki tomon o‘rtasida o‘ndan ortiq shartnoma imzolangani haqida xabar berilgandi.
