Termizga BMTning Afg‘oniston uchun ajratgan gumanitar yordami yetib keldi
Termizga BMTning Afg‘oniston uchun gumanitar yordam ortilgan samolyoti keldi. Bu haqda “Sputnik Uzbekistan” xabar berdi.
Bugun mahalliy vaqt bilan 11:20 da Termiz aeroportiga Il-76 samolyoti qo‘ngan. Uning bortida birinchi zarurat buyumlari mavjud. Termizda tashkil etilgan logistika markazi orqali gumanitar yordam Afg‘onistonning Mozori Sharif shahriga jo‘natilishi rejalashtirilgan.
13-oktabr kuni BMTning qochqinlar masalasi bo‘yicha Oliy Komissari Termiz orqali Afg‘onistonga gumanitar yordam yetkazib berilishini maʼlum qilgandi.
Shuningdek, 15-17 oktabr kunlari Dubaydan Afg‘oniston uchun belgilangan gumanitar yordamning navbatdagi partiyasi ham olib kelinadi. Maʼlumotlarga ko‘ra,oktabr oyi boshlaridan buyon qo‘shni respublikaga Termizdan temiryo‘l orqali 40 vagon oziq-ovqat yetkazib berilgan.
Avvalroq Afg‘onistonning SHHTdagi ishtiroki haqida xabar berilgandi. Shuningdek, O‘zbekiston Pentagon kuchlarini respublika hududiga joylashtirmoqchi emasligi maʼlum bo‘lgandi.
Jahongir Qo'ziyev
