Kumandan so‘ng yana bir gollandiyalikning “Barselona”dan ketishi aniq bo'ldi
Hujumchi Lyuk de Yong qishki transfer oynasida “Barselona”ni tark etishi mumkin.
31 yoshli futbolchining transferini talab qilgan murabbiy Ronald Kuman ishdan bo‘shatilganidan so‘ng hujumchi endi klub rahbariyatini qiziqtirmasligi tabiiy. Kataloniyaliklar futbolchini yanvar oyida boshqa klubga o‘tkazishga harakat qiladi.
“Barselona” yozda de Yongni “Sevilya”dan ijaraga olgandi. Qoidaga ko‘ra, futbolchi bir mavsumda birdaniga uchta jamoada o‘ynay olmaydi, biroq de Yong bu yil “Sevilya”da birorta ham o‘yin o‘tkazmagan. Shu sababli boshqa klubga o‘tish barcha tomonlarning roziligi bilan amalga oshishi mumkin.
Eslatib o‘tamiz, hujumchi bu mavsum “Barselona” safida 6 o‘yinda 1 ta gol urdi.
Avvalroq Xavi “Barselona”ga bosh murabbiy bo‘lishga rozilik bildirgani va “Real Madrid” 1 yanvargacha Mbappeni qo‘lga kiritmoqchi ekanligi haqida xabar berilgandi.
Jamshidbek Amirov
