Germaniya "Tolibon" bilan aloqalarni kengaytirmoqchi
Shuningdek, Berlin toliblar joriy etgan pasportni tan olilshi mumkinligi maʼlum qilindi.
Germaniya hukumati “Tolbion” bilan muloqotni faollashtirish niyatida. Bu haqda Welt am Sonntag nashri xabar berdi.
Nashr maʼlumotlariga ko‘ra, yaqin haftalar ichida Germaniya elchisi Markus Potsel Afg‘onistonga boradi. U toliblar bilan mamlakatda nemis diplomatlari faoliyatini yo‘lga qo‘yish yuzasidan muzokara o‘tkazmoqchi.
Muloqot yo‘lga qo‘yilishidan asosiy maqsad – afg‘on xalqiga gumanitar yordam berishdir. Shu bilan birga, rasmiy Berlin “Tolibon” tomonidan aholiga berilayotgan pasportlarni tan olish masalasini ham ko‘rib chiqyapti. Hukumatning fikricha, bu nemis qurolli kuchlariga yordam bergan afg‘onlarning mamlakatdan chiqib ketishini osonlashtirishi mumkin.
Bundan avval "Tolibon" saflarida keng ko‘lamli “tozalash” ishlari boshlangani hamda Afg‘oniston Xitoy bilan savdosini tiklagani haqida xabar berilgandi.
Jahongir Qo‘ziyev
