O‘zbekiston tarixida ilk bor BMT IHK byurosi faoliyatida ishtirok etadi
O‘zbekistonning Jenevadagi doimiy vakili BMT Inson huquqlari bo‘yicha kengashi raisining o‘rinbosari etib saylandi.
O‘zbekistonning doimiy vakili nomzodi ko‘rsatilgan Osiyo-Tinch okeani mintaqasi BMT IHK tizimidagi eng yiriklardan biri hisoblanadi. Guruhda 56 ta davlat bor. BMT Inson huquqlari bo‘yicha kengashi byurosi tarkibi IHK raisi hamda uning turli geografik guruhlardan saylangan to‘rtta o‘rinbosaridan tashkil topgan.
Tashqi ishlar vazirligi axborot xizmati xabariga ko‘ra, Osiyo-Tinch okeani mintaqaviy guruhiga aʼzo davlatlar O‘zbekistonning Jeneva shahridagi BMT bo‘linmasi va boshqa xalqaro tashkilotlardagi doimiy vakili nomzodini 2022-yil uchun BMT Inson huquqlari bo‘yicha kengashi raisining o‘rinbosari lavozimiga bir ovozdan qo‘llab-quvvatladi.
Qayd etilishicha, O‘zbekiston vakilining ushbu lavozimga saylanishi respublikamizda inson huquqlari sohasida amalga oshirilayotgan keng ko‘lamli islohotlarning jahon hamjamiyati tomonidan ijobiy baholanayotganining ifodasidir.
Maʼlumot uchun: 2020-yilda O‘zbekiston 2021-2023 yillar mobaynida BMT Inson huquqlari bo‘yicha kengashining to‘laqonli aʼzosi etib saylangan va tashkilot doirasida faol ish olib bormoqda.
Eslatib o‘tamiz, kengash majlislari BMTning Jenevadagi vakolatxonasida o‘tkaziladi.
BMT IHK tarkibiga 47 davlat kiradi. Butun dunyo bo‘ylab inson huquqlarini ilgari surish va himoya qilishga masʼul tuzilma hisoblanadi. Kengash vakolatiga inson huquqlari sohasidagi eʼtiborga molik bo‘lgan barcha masalalar va vaziyatlarni muhokama qilish kiradi.
Avvalroq BMTning tavsiyalari hayotga tatbiq etilayotgani, O‘zbekiston navbatdagi xalqaro shartnomaga qo‘shilgani hamda BMTning din va eʼtiqod erkinligi bo‘yicha maxsus maʼruzachisi O‘zbekistonga tashrif buyurishi haqida xabar berilgandi.
