Moheb: G‘anining ketishi Afg‘onistonga “yuz foiz” foyda bo‘ldi
Afg‘oniston hukumatining sobiq milliy xavfsizlik maslahatchisi Hamdulloh Moheb “Amerika Ovozi” bilan suhbatda Tolibonning mamlkatga kirib kelishi va Ashraf G‘anining ketishi haqida gapirdi.
Uning taʼkidlashicha, Tolibon Kobul “darvoza”siga yetib borgach, Ashraf G‘anini Kobulda qoldirish maqsad qilingan. Biroq sobiq prezident boshqa yo‘l tutgan. Uning ketishi esa Qo‘shma Shtatlar bilan maslahatsiz va muvofiqlashtirishsiz bo‘lgan.
Hamrulloh Mohebning aytishicha, G‘anining Afg‘onistonni tark etish qarori “100 foiz” Afg‘oniston foydasiga ishladi.
Shuningdek, uning fikriga ko‘ra, Afg‘onistondagi vaziyatga Xalilzod ham sababchi.
“Xalilzod Tolibonning qo‘lidan ushlab, Kobulga olib keldi. Biroq, Afg‘oniston Respublikasining qulashi uchun barcha tomonlar javobgardir”, - deydi Moheb.
Hamdulloh Moheb intervyusida Tolibon Pokistonning ISA harbiy razvedka byurosi ko‘rsatmasi ostida Kobulga kelganidan so‘ng prezident G‘anini “qatl qilish”ni maqsad qilgani haqida maʼlumotga ega ekanligini aytgan.
“Buni Afg‘oniston hukumati ham, AQSH razvedkasi ham bilar edi”, - deydi u.
Maʼlumot uchun, 2021 yil 15 avgustida Muhammad Ashraf G‘ani va uning qo‘l ostida ishlagan davlat xizmatchilari Afg‘onistondagi ziddiyatli vaziyat sabab mamlakatni tark etgan. Shundan so‘ng, oradan bir necha soat o‘tib, Tolibon hukumat tepasiga kelganini eʼlon qildi.
Avvalroq “Tolibon” rahbariyati BMTdan yordam so‘ragani hamda Ashraf G‘ani BAAdan Afg‘oniston aholisiga murojaat qilgani haqida xabar berilgandi.
Olamgir Abdiyev
