Vashington ukrainalik qochqinlarni qabul qilgan davlatlarga katta mablag‘ bermoqchi
Buning uchun maxsus fond tuziladi.
AQSH Ukraina va qochqinlarni qabul qilayotgan davlatlar uchun fond tuzadi. Bu haqda AQSH davlat kotibi Entoni Blinken Moldaviya prezidenti Maya Sandu bilan uchrashuv yakunlari bo‘yicha brifingda ma’lum qildi.
Ushbu fondga 2.5 mlrd dollar mablag‘ jalb etiladi. Davlat kotibining so‘zlariga ko‘ra, ushbu jamg‘armani tuzish uchun Bayden administrasiyasi shoshilinch qaror qabul qilgan.
Blinken Moldaviyaga qochqinlar masalasida yordam ko‘rsatilishini aytgan. Shuningdek, u Kishinyovning xatti-harakatlari “hurmatga sazovor” ekanini qayd etgan.
Ma’lumot o‘rnida: 24-fevral kuni Rossiya Ukrainada maxsus harbiy operasiya boshlagach, ko‘plab ukrainaliklar mamlakatni tark etdi. BMT ma’lumotlariga ko‘ra, ularning soni 1.5 milliondan ortiq. Qochqinlarning aksariyati Polshaga ketgan. YeI ukrainaliklarga 1 yildan 3 yilgacha Yevroittifoq hududida qolishiga ruxsat berdi.
Avvalroq Putin Ukrainaga qarshi operasiyani boshlash qiyin qaror bo‘lganini ma’lum qilgandi.
