KXDR yangi raketa sinovi o‘tkazishga tayyor – Janubiy Koreya va AQSH razvedkasi
Pxenyan oxirgi marta 5 mart kuni raketa uchirgandi.
Shimoliy Koreya shu haftada yana raketa sinovlari o‘tkazishi mumkin. bu haqda Yonhap agentligi xabar berdi.
“Aniq vaqtni aytish qiyin, ammo AQSH va Koreya Respublikasi razvedkasi yana bir (raketa) sinovi o‘tkazilishi imkoniyatiga tayyor hamda vaziyatning o‘zgarishini doimiy ravishda kuzatib boryapti. Biz to‘liq tayyorgarlikni saqlab qolganmiz”, – degan Janubiy Koreya shtab boshliqlari Qo‘mitasi vakili.
Yonhap maʼlumotlariga ko‘ra, noqulay ob-havo sharoitlariga qaramay, Pxenyan navbatdagi raketani uchirishga tayyor.
11 mart kuni Vashington va Seul KXDRning 27 fevral hamda 5 martdagi raketa sinovlarini muhokama qilgandi. AQSH Shimoliy Koreya tez orada “kosmik raketa niqobi ostida to‘liq uzoqlikdagi raketa sinovi o‘tkazishi” ehtimoli borligini taxmin qilgan.
Eslatib o‘tamiz, avvalroq AQSH Shimoliy Koreya bilan hech qanday shartlarsiz muhokama o‘tkazishga tayyorligi to‘g‘risida xabar berilgandi.
