Farg‘onadagi bog‘chada tok urgan 6 yoshli bola ishi bo‘yicha sud-tibbiy ekspertiza tayinlandi
Holat Bolalar ombudsmani tomonidan nazoratga olindi.
Avval xabar qilinganidek, joriy yilning 18-fevral kuni Farg‘ona shahrida joylashgan maktabgacha ta’lim muassasasida tarbiyalanuvchi, 2020-yilda tug‘ilgan R.A, muassasa hududidagi transfarmatorlar o‘rnatilgan maxsus yerto‘laga yiqilib tushgan. Hodisa natijasida bola tok urishi oqibatida tan jarohati oldi va shifoxonaga yetkazilgan.
Mazkur holat Bolalar ombudsmani tomonidan doimiy nazoratga olingan. Hozirda bolaning olgan tan jarohatlari bo‘yicha sud-tibbiy ekspertizasi tayinlangan.
Farg‘ona shahar IIB huzuridagi tergov bo‘limi hodisa yuzasidan tergovga qadar tekshiruv ishlarini olib bormoqda.
Bolalar ombudsmani bola manfaatlarini ta’minlash nuqtai nazaridan hodisa ustidan kuzatuvini davom ettiradi va barcha zarur choralar ko‘rilishini ta’minlaydi.
