Isroil armiyasi yuqori jangovar tayyorgarlik holatiga o‘tkazildi — Ynet
Razvedka nishonlar ro‘yxatini kengaytirmoqda, operatsiyalar tezlashtirilmoqda.
Ynet nashri xabariga ko‘ra, Isroil Mudofaa Kuchlari bosh shtabi boshlig‘i Eyal Zamir armiyani yuqori jangovar tayyorgarlik holatiga keltirish va Eronga qarshi ehtimoliy harbiy harakatlarga tayyorlanishni buyurgan.
Manbalarga ko‘ra, mazkur qaror 11–12 aprel kunlari Islomobod shahrida bo‘lib o‘tgan AQSh–Eron muzokaralarining muvaffaqiyatsiz yakunlanganidan so‘ng qabul qilingan.
Qayd etilishicha, Isroil havo kuchlari zarba beruvchi guruhlarni ehtimoliy operatsiyalarga tayyorlamoqda, razvedka esa ehtimoliy nishonlar ro‘yxatini kengaytirmoqda. Shu bilan birga, harbiy harakatlarni qayta boshlash bo‘yicha yakuniy qaror hali qabul qilinmagan.
Shuningdek, Yedioth Ahronoth nashrining yozishicha, Isroil armiyasi operatsion jarayonlarni tezlashtirish, javob berish vaqtini qisqartirish hamda jangovar tayyorgarlikni maksimal darajada ushlab turish bo‘yicha ko‘rsatmalar olgan.
Harbiy manbalar IDF tomonidan avvalgi harbiy to‘qnashuvlar tajribasiga asoslangan soddalashtirilgan jangovar protokollar joriy etilganini ham ta’kidlamoqda.
