Tramp bir soatda yetti marta yolg‘on gapirdi — Eron parlamenti spikeri
G‘olibaf AQSH blokadasi davom etsa, Hormuz bo‘g‘ozi “ochiq qolmasligini” bildirdi.
AQSH bilan Islomobodda bo‘lib o‘tgan so‘nggi muzokaralarda Eron delegatsiyasiga boshchilik qilgan Eron parlamenti spikeri Muhammad Bag‘ir G‘olibaf X ijtimoiy tarmog‘ida Donald Trampning bayonotlari yolg‘on ekanini aytdi, deya xabar bermoqda BBC.
“AQSH Prezidenti 1 soat ichida 7 ta da’vo qildi va ularning barchasi yolg‘on edi. Ular urushda g‘alaba qozonishmadi va bu yolg‘onlar bilan muzokaralarda ham hech narsaga erisha olmaydi”, — deya qo‘shimcha qildi G‘olibaf.
U Hormuz bo‘g‘ozi haqida gapirar ekan, agar AQSH blokadasi davom etsa, bo‘g‘oz “ochiq qolmasligini” ta’kidladi.
Shuningdek, G‘olibaf Eron Tashqi ishlar vazirligi matbuot kotibi Ismoil Baqoiy ilgari bildirgan fikrlarni takrorladi. Baqoiyga ko‘ra, bo‘g‘oz ochiq yoki yopiq bo‘lishi hamda u yerda amal qilinadigan tartiblar ijtimoiy tarmoqlarda emas, amalda hal etiladi.
G‘olibaf va Baqoiy bayonotlari Eron tashqi ishlar vaziri Abbos Aroqchining X tarmog‘idagi posti ortidan yangradi. Aroqchi Hormuz bo‘g‘ozi orqali sulhning qolgan davrida barcha tijorat kemalari harakatlanishi mumkinligini yozgan edi.
Aroqchining bu bayonoti Eron ichidagi ayrim ommaviy axborot vositalari va konservativ doiralar tanqidiga uchrab, undan izoh berish talab qilindi.
“Axborot urushi va jamoatchilik fikrini shakllantirish urushning muhim qismidir, biroq Eron xalqiga bunday usullar ta’sir qilmaydi”, — dedi G‘olibaf.
Hormuz bog‘ozi bo‘yicha so‘nggi bayonotlar:
Donald Tramp — AQSH prezidenti Yaqin Sharqdagi vaziyat, xususan Eron bilan bog‘liq jarayonlar “yaxshi ketayotgandek” ekanini aytdi. Uning so‘zlariga ko‘ra, dam olish kunlari muzokaralar bo‘lib o‘tadi va u hali oshkor eta olmaydigan “yaxshi yangiliklar” bor.
Kecha esa Tramp Truth Social platformasida AQSHning Eron portlariga nisbatan dengiz blokadasi “Eron bilan kelishuv 100 foiz yakunlanmaguncha” davom etishini bildirgan edi.
Yevropa yetakchilari — Fransiya prezidenti Emmanuel Makron va Buyuk Britaniya bosh vaziri Kir Starmer 40 ga yaqin davlat ishtirokida virtual yig‘ilish o‘tkazdi. Unda bo‘g‘ozni ochiq saqlash bo‘yicha global choralar muhokama qilindi.
Starmerning aytishicha, Buyuk Britaniya va Fransiya “imkon bo‘lishi bilan” ushbu hududda erkin suzishni ta’minlash uchun xalqaro harakatga rahbarlik qiladi.
Xitoy rahbari Si Jinpin — Trampning ta’kidlashicha, Xitoy prezidenti Si Jinpin Hormuz bo‘g‘ozining ochilishida juda mamnunligini bildirgan.
