Fuqaroning plastik kartasidan 142 mln so‘m o‘g‘irlagan voyaga yetmaganlar qo‘lga olindi
Ular ushbu jinoyatni o‘zaro til biriktirib, mobil qurilmalar orqali sodir etgan.
Fuqaroning plastik kartasidagi 100 million so‘mdan ortiq mablag‘ni yechib olgan kiberfiribgarlar qo‘lga olindi. Bu haqda Farg‘ona IIB xabar berdi.
Ma’lum qilinishicha, Farg‘ona shahrida yashovchi fuqaro 2026-yil 6-fevral kuni uning bank plastik kartasidan noma’lum shaxslar tomonidan axborot tizimidan ruxsatsiz foydalangan holda 142 million so‘m mablag‘ yechib olingani haqida murojaat qilgan.
Mazkur holat yuzasidan 2026-yil 13-fevral kuni noma’lum shaxsga nisbatan Jinoyat kodeksining 169-moddasi 3-qismi “B” bandi bilan jinoyat ishi qo‘zg‘atilgan. Olib borilgan tezkor surishtiruv tadbirlari davomida ushbu jinoyatni Toshkent shahrida yashovchi 2008- va 2009-yilda tug‘ilgan shaxslar o‘zaro til biriktirib, bir guruh bo‘lib, mobil qurilmalari orqali sodir etgani aniqlangan.
Gumonlanuvchilar o‘z ko‘rsatmalarida bunday harakatlarni boshqa takrorlamasliklarini bildirgan. Ular begona shaxslarga verifikatsiyadan o‘tish yoki shaxsiy ma’lumotlarni berish mumkin emasligini, bu noto‘g‘ri yo‘l ekanini ta’kidlab, qilgan ishidan pushaymon ekanini ma’lum qilgan hamda kelgusida bunday holatlarni takrorlamaslikka va’da bergan.
Tezkor tadbir davomida ikki nafar shaxs qo‘lga olinib, ulardan mobil qurilmalar daliliy ashyo sifatida rasmiylashtirib olingan.
Mazkur jinoyat ishi yuzasidan ikki nafar voyaga yetmagan shaxsga nisbatan O‘zbekiston Respublikasi Jinoyat kodeksining 169-moddasi 3-qismi “B” va “V” bandlari bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Hozirda dastlabki tergov harakatlari olib borilmoqda.
