Zelenskiy Rossiyaning sulh taklifiga munosabat bildirdi
9-may arafasidagi sulh taklifi Tramp va Putin o‘rtasidagi telefon suhbatida ilgari surilgan.
Volodimir Zelenskiy Ukraina qisqa muddatli emas, balki uzoq muddatli o‘t ochishni to‘xtatish tarafdori ekanini ma’lum qildi. U Moskvadagi G‘alaba kuni paradi uchun “bir necha soatlik xavfsizlik” bilan cheklanib qolmaslik zarurligini ta’kidladi.
Zelenskiy o‘z bayonotida vakillariga AQSh Prezidenti jamoasi bilan bog‘lanib, Rossiya tomonidan ilgari surilgan sulh taklifining aniq tafsilotlarini o‘rganish topshirilganini bildirdi.
Uning so‘zlariga ko‘ra, gap qisqa muddatli xavfsizlik choralari haqida ketyaptimi yoki kengroq kelishuv nazarda tutilganmi — bu aniqlashtiriladi.
“Bizning taklifimiz — o‘t ochishni uzoq muddatga to‘xtatish, aholining xavfsizligini ishonchli ta’minlash va barqaror tinchlikka erishishdir. Ukraina bu yo‘lda har qanday maqbul va samarali formatda ishlashga tayyor”, — dedi u.
Avvalroq, Vladimir Putin Donald Tramp bilan telefon muloqoti chog‘ida 9-may arafasida vaqtinchalik sulh e’lon qilishni taklif qilgani xabar qilingan edi.
Rossiya Prezidenti yordamchisi Yuri Ushakovning bildirishicha, suhbat Rossiya tashabbusi bilan o‘tkazilgan. Tramp esa keyinchalik ushbu “kichik sulh” g‘oyasini aynan o‘zi ilgari surganini aytgan.
Ma’lumot uchun, oxirgi marta frontda sulh 2026-yil aprel oyida Pasxa bayrami munosabati bilan e’lon qilingan edi.
