Eron yahudiylari vakili Mujtabo Xomanaiy rahbariyatini qo‘llab-quvvatladi
Eron yahudiylari jamiyatning ajralmas qismi ekani ta’kidlanib, mamlakat rahbariyatiga nisbatan ijobiy munosabat bildirildi.
Eron yahudiylar jamoasi vakili Humoyun Sameh Najafabadiy mamlakat oliy rahbari Mujtaba Xomanaiy boshchiligidagi rahbariyatni qo‘llab-quvvatlashini ma’lum qildi. Bu haqda Al Mayadeen yozmoqda.
Uning bayonoti AQSh va Isroil siyosatiga qarshi o‘tkazilgan ommaviy yig‘ilishda yangragan. Nutqda Eron yahudiylari jamiyatning ajralmas qismi ekani ta’kidlanib, mamlakat rahbariyatiga nisbatan ijobiy munosabat bildirildi.
Shuningdek, u xalq va qurolli kuchlar o‘rtasidagi birlik muhimligini ta’kidlab, bosimlarga qarshi eronliklar namoyish etayotgan “qat’iy qarshilik”ni yuqori baholadi.
“Doimo sevimli Eronimizning g‘alabasiga guvoh bo‘laylik va yaqinlashib kelayotgan zafarni birgalikda nishonlaylik — bu bizning sobitligimiz va birdamligimiz samarasidir”, — deya so‘zini yakunladi u.
Ma’lumotlarga ko‘ra, so‘nggi haftalarda Eronga qarshi yuz bergan harbiy harakatlar davomida Tehrondagi yahudiy ibodat maskanlaridan biri — Rafi Nia sinagogasi zararlangan.
Mazkur holat yuzasidan Humoyun Sameh Najafabadiy avvalroq bayonot berib, zarbalarni keskin qoralagan va diniy obyektlar nishonga olinganini bildirgan.
Uning ta’kidlashicha, bu kabi hodisalar nafaqat musulmonlar, balki boshqa diniy jamoalarga ham ta’sir ko‘rsatmoqda.
