Farg‘onada ayoli va qizini qasddan o‘ldirgan erkak 19 yilga qamaldi
Erkak mast holda qaynotasining uyiga kelib, aliment to‘lamaslik maqsadida xotini va 2 yoshli qizini pichoqlagan.
Farg‘ona viloyati O‘zbekiston tumanida turmush o‘rtog‘i va voyaga yetmagan farzandini qasddan o‘ldirishda ayblangan erkakka sud hukmi o‘qildi. Bu haqda “Zamon” dasturida ma’lum qilindi.
Ma’lumotlarga ko‘ra, 2025-yil 3-noyabr kuni spirtli ichimlik ta’sirida qaynotasining uyiga kelgan fuqaro Hayitov turmush o‘rtog‘i bilan uchrashgan. Ayol avvalroq turmush o‘rtog‘ini aliment undirish masalasida sudga bergan va sud qaroriga ko‘ra erkak 15 sutkaga qamalgan.
Qayd etilishicha, erkak jazo muddatini o‘tab chiqqach, er-xotin o‘rtasidagi mojaro yanada keskinlashgan. Tergov ma’lumotlariga ko‘ra, u aliment to‘lashdan qutulish maqsadida voyaga yetmagan farzandlari ko‘z o‘ngida cho‘ntagida olib kelgan oshxona pichog‘i bilan turmush o‘rtog‘iga bir necha marotaba tan jarohati yetkazgan. Shundan so‘ng u 2023-yilda tug‘ilgan qiziga ham pichoq bilan zarba bergan.
Zarbalar natijasida bola voqea joyida halok bo‘lgan, ayol esa shifoxonaga olib ketilayotgan vaqtda vafot etgan. Jinoyatni sodir etgan erkak voqea joyidan qochib ketgan.
Jinoyat ishlari bo‘yicha O‘zbekiston tumani sudi uni Jinoyat kodeksining 97-moddasi 2-qismi “a”, “v”, “j”, “i” bandlari bilan aybdor deb topib, 19 yil muddatga ozodlikdan mahrum qildi. U jazoni umumiy tartibli koloniyada o‘taydi.
Avvalroq Sirdaryo viloyatida ayol shar’iy nikohdagi erining qonuniy xotinini va 5 yoshli qizini pichoqlab o‘ldirgani haqida xabar berilgandi. Holat yuzasidan jinoyat ishi qo‘zg‘atilgan. Ayol qamoqqa olingan.
