Armaniston bosh vaziri Moskvadagi 9-may tadbirlarida qatnashmaydi
Rossiya TIV Nikol Pashinyanning mazkur qaroriga e’tiroz bildirdi.
Armaniston bosh vaziri Nikol Pashinyan 9-may kuni Moskvada o‘tkaziladigan tantanalarda ishtirok etmasligini ma’lum qildi. U bu qarorini 1-aprel kuni Rossiyaga tashrifi davomida Vladimir Putinga bildirgan. Bu haqda DW xabar berdi.
Rasmiy izohga ko‘ra, safarning bekor qilinishiga mamlakatda boshlanayotgan saylovoldi kampaniyasi sabab bo‘lgan. Armanistonda parlament saylovlari 7-iyunga belgilangan bo‘lib, uning yakunlariga ko‘ra yangi hukumat rahbari aniqlanadi.
Shu fonda Rossiya Tashqi ishlar vazirligi rasmiy vakili Mariya Zaxarova Yerevanni ilgari berilgan “Rossiyaga qarshi harakat qilmaslik” majburiyatiga amal qilmaslikda aybladi. U, shuningdek, Armanistonning Ukraina prezidenti Volodimir Zelenskiyni qabul qilganini tanqid qilib, bu holat Rossiya jamoatchiligida norozilik uyg‘otganini ta’kidladi.
Avvalroq Slovakiya bosh vaziri Robert Fitso ham Qizil maydondagi paradda qatnashmasligini, Moskvaga borib Putin bilan uchrashib, “Noma’lum askar” poyiga gul qo‘yishini ma’lum qilgandi.
Eslatib o‘tamiz, joriy hafta boshida Yevropa Ittifoqi va Armaniston o‘rtasida tarixda ilk bor ikki tomonlama sammit bo‘lib o‘tdi. Unda Zelenskiy ham ishtirok etdi.
Yerevanda o‘tgan uchrashuvda xavfsizlik va mudofaa, energetika, transport hamda raqamlashtirish yo‘nalishlarida hamkorlikni kengaytirish masalalari, shuningdek Ukrainadagi vaziyat va Erondagi urush oqibatlari muhokama qilindi.
