Qozog‘istonda o‘zbeklardan pul talab qilgan shaxslar ushlandi
Ayni paytda ish bo‘yicha zarur tergov harakatlari olib borilayotgani bildirildi.
Qozog‘istonning Turkiston viloyatida joylashgan “Qoplonbek” chegara o‘tkazish punktida fuqarolarni qo‘rqitib, ulardan pul talab qilgan shaxs qo‘lga olindi. Bu haqda Turkiston viloyati Politsiya departamenti ma’lum qildi.
Avvalroq noma’lum shaxslar Qozog‘iston hududida o‘zbekistonlik haydovchilardan turli bahonalar bilan pul talab qilishga urinayotgani haqida xabar berilgandi.
Idora ma’lumotiga ko‘ra, Sariag‘ash tumanidagi mazkur o‘tkazish punkti hududida sodir etilgan noqonuniy harakatlar yuzasidan jinoyat ishi qo‘zg‘atilgan. Gumonlanuvchi sifatida Turkiston viloyatining 43 yoshli, ishsiz va doimiy yashash joyiga ega bo‘lmagan fuqarosi ushlangan.
Tergov ma’lumotlariga ko‘ra, u olti qirrali buragich (“otvyortka”) bilan tahdid qilib, O‘zbekistondan o‘tgan shaxslardan “ulush” talab qilgan.
Hozirda gumonlanuvchi Sariag‘ash tumani politsiya boshqarmasining vaqtinchalik saqlash hibsxonasiga joylashtirilgan. Hodisa qachon sodir bo‘lganiga aniqlik kiritilmagan.
Politsiya departamenti ayni paytda ish bo‘yicha zarur tergov harakatlari olib borilayotganini bildirdi. Shuningdek, har qanday noqonuniy xatti-harakat Qozog‘iston qonunchiligiga muvofiq javobgarlikka sabab bo‘lishi eslatildi.
