Farg‘onada avtomobil g‘ildiraklari ichiga yashirilgan 20 kgga yaqin narkotik moddalar fosh etildi
Narkotik moddalar qo‘shni mamlakatdan olib kirilgan.
Farg‘ona viloyati Rishton tumani “Dehqonobod” mahallasida yirik miqdordagi narkotik moddalarning noqonuniy aylanmasi fosh etildi. Bu haqda Zamon.uz’ga DXX xabar berdi.
Ma’lum qilinishicha, qo‘shni mamlakatdan kelgan “Volvo” rusumli yuk mashinasining g‘ildiraklari ichiga yashirilgan narkotik moddalarni olayotgan vaqtlarida avtomashina haydovchisi hamda buyurtmachi hisoblangan Uchko‘prik tumanida yashovchi, shaxs ushlandi.
Avtomashina g‘ildiraklari ichiga jami 3 kg 408 gr “opiy” va 16 kg 405 gr “gashish” moddalari yashirilganligi aniqlanib, tegishli tartibda rasmiylashtirib olindi.
Shuningdek, ushbu noqonuniy ishga buyurtmachi shaxsning otasi ham aloqador ekanligi aniqlanib, u ham protsessual tartibda ushlandi.
Hozirda mazkur fuqarolarga nisbatan Jinoyat Kodeksining 246-moddasi 2-qismi va 25,273-moddasi 5-qismi bilan jinoyat ishi qo‘zg‘atilib, “qamoq” ehtiyot chorasi qo‘llanildi.
