Eron futbolchilari uchun AQSh vizalari haligacha berilmayapti
Eron futbol federatsiyasi rahbari FIFA bilan viza masalasi yuzasidan hal qiluvchi muzokaralar o‘tkazilishini bildirgan.
2026 yilgi futbol bo‘yicha Jahon chempionati boshlanishiga bir oydan kam vaqt qolganiga qaramay, Eron terma jamoasi futbolchilari uchun AQSh vizalari hali rasmiylashtirilmagan. Bu haqda Eron futbol federatsiyasi prezidenti Mehdi Toj ma’lum qildi, deya xabar bermoqda Al Jazeera.
IRNA davlat agentligi xabariga ko‘ra, federatsiya rahbari yaqin kunlarda FIFA bilan viza masalasi yuzasidan hal qiluvchi muzokaralar o‘tkazilishini bildirgan.
“Ertaga yoki indinga FIFA bilan hal qiluvchi uchrashuv o‘tkazamiz. Ular bizga kafolat berishi kerak, chunki viza masalasi hanuz hal bo‘lgani yo‘q”, — degan Mehdi Toj.
Uning aytishicha, hozirgacha Eron delegatsiyasining biror a’zosiga AQSh vizasi berilgani haqida rasmiy ma’lumot kelmagan.
Ma’lumotlarga ko‘ra, futbolchilar viza olish jarayonining bir qismi sifatida Turkiya poytaxti Anqaraga borib, barmoq izi topshirishi kerak. Shu bilan birga, Eron futbol federatsiyasi ushbu jarayonni Antaliya shahrida tashkil etishga urinmoqda. Chunki AQSh va Eron 1980-yildan buyon diplomatik munosabatlarga ega emas.
Bundan tashqari, AQSh va Isroilning 28-fevral kuni Eronga qarshi boshlagan harbiy hujumlari ortidan mintaqadagi vaziyat yanada keskinlashgan edi. Hozirda tomonlar o‘rtasida 8-apreldan buyon "mo‘rt" sulh saqlanib qolmoqda.
Chorshanba kuni Tehronda Eron terma jamoasini Jahon chempionatiga kuzatish marosimi o‘tkazildi. AQSh, Meksika va Kanada mezbonlik qiladigan mundial davomida Eron jamoasi Arizona shtatining Tukson shahrida joylashadi.
Eron terma jamoasi turnirdagi ilk uchrashuvini 15-iyun kuni Los-Anjelesda Yangi Zelandiya terma jamoasiga qarshi o‘tkazadi. G guruhi doirasida eronlik futbolchilar Belgiya va Misr terma jamoalariga qarshi ham maydonga tushadi.
