Prezident Shavkat Mirziyoyev kiberxavfsizlik boʻyicha Turkiy alyans tashkil etishni taklif qildi

Shavkat Mirziyoyev Turkiston shahrida boʻlib oʻtgan Turkiy davlatlar tashkiloti norasmiy sammitida nutq soʻzlab, turkiy dunyo integratsiyasini mustahkamlash, sunʼiy intellekt va raqamli rivojlanish sohalarida hamkorlikni kengaytirish boʻyicha qator muhim tashabbuslarni ilgari surdi.

 

Davlat rahbari sammit mezboni — Qasim-Jomart Toqayevga anjuman yuqori saviyada tashkil etilgani uchun minnatdorlik bildirib, Turkiston shahri turkiy xalqlar birdamligi va mushtarak qadriyatlarining yorqin timsoli ekanini taʼkidladi.

 

Nutqda bugungi murakkab geosiyosiy sharoitda turkiy davlatlar oʻrtasidagi integratsiya strategik ahamiyat kasb etayotgani qayd etildi. Soʻnggi yillarda Turkiy davlatlar tashkilotining iqtisodiy va institutsional salohiyati sezilarli darajada mustahkamlangani, tashkilot mamlakatlarining umumiy iqtisodiy hajmi 2,4 trillion dollardan oshgani alohida taʼkidlandi.

 

Prezident sunʼiy intellekt sohasida strategik hamkorlik tarmogʻini yaratish, “Raqamli turkiy koridor” konsepsiyasini ishlab chiqish hamda Toshkentda Texnologiyalar forumini oʻtkazishni taklif etdi. Shuningdek, data markazlarini oʻzaro bogʻlash, bulutli va kvant texnologiyalarini rivojlantirish masalalariga eʼtibor qaratildi.

 

Taʼlim va ilm-fan yoʻnalishida esa Islom sivilizatsiyasi markazi bazasida tarixiy-madaniy merosni yagona “katta maʼlumotlar” platformasiga jamlash tashabbusi ilgari surildi. Yoshlarni zamonaviy kasblarga tayyorlash maqsadida amalga oshirilayotgan “5 million sunʼiy intellekt yetakchilari” dasturi haqida ham maʼlumot berildi.

 

Nutqda transport va logistika tizimlarini raqamlashtirish, ekologik xavflarni sunʼiy yoʻldosh orqali monitoring qilish, kiberxavfsizlik boʻyicha Turkiy alyans tashkil etish kabi masalalar ham ilgari surildi.

 

Sammit yakunida Turkiston deklaratsiyasini qabul qilish rejalashtirilgani qayd etildi.