Jizzax va Farg‘onada mansabdor shaxslar pora bilan qo‘lga olindi
Jizzaxda hokimlik mansabdori ishga joylashtirish uchun, Farg‘onada bank xodimi kredit rasmiylashtirib berish uchun pul talab qilgan.
Jizzax viloyati Sharof Rashidov tumanida hokimlik mansabdor xodimi yer maydoni ajratib berish va ishga joylashtirish evaziga pul talab qilgani uchun ushlandi. Bu haqda DXX xabar berdi.
Ma’lum qilinishicha, mansabdor shaxs tadbirkorning ishonchiga kirib, tuman melioratsiya bo‘limi balansidagi 45 sotix yer maydonini yaqin aloqalari orqali olib berishni va fuqaroning 2002-yilda tug‘ilgan tanishini mahalliy MChJlardan biriga ishga joylashtirishni va’da qilgan. Buning evaziga u 500 AQSH dollari talab qilgan.
Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda mansabdor shaxs so‘ralgan pul mablag‘ini olayotgan vaqtida ashyoviy dalillar bilan ushlangan.
Tergovga qadar tekshiruv davomida u ushbu masalalarni hal qilib berish bahonasida avval ham 3,5 million so‘m olib, uni shaxsiy ehtiyojlariga sarflab yuborgani aniqlangan.
Yana bir holatda, respublikadagi xususiy aksiyadorlik tijorat banklaridan birining Farg‘ona bank xizmatlari markazi rahbari ham pora olishda qo‘lga tushgan.
U tadbirkorlik faoliyatini boshlamoqchi bo‘lgan fuqaroning ishonchiga kirib, bank bosh ofisidagi tanishlari orqali 2,5 milliard so‘m kredit ajratib berishni va’da qilgan. Evaziga kredit summasining 5 foizi — 125 million so‘m talab qilingan.
Tezkor tadbir davomida bank mansabdori so‘ralgan mablag‘ hisobidan 10 ming AQSH dollarini olayotgan vaqtida ashyoviy dalillar bilan ushlangan.
Hozirda har ikki holat yuzasidan tergovga qadar tekshiruv harakatlari olib borilmoqda.
