O‘zbekiston va Qirg‘iziston yetakchilari telefon orqali muloqot o‘tkazdi
O‘zbekiston Prezidenti Qirg‘izistonning BMT Xavfsizlik Kengashiga saylangani bilan Sadir Japarovni tabrikladi.
Prezident Shavkat Mirziyoyev 4-iyun kuni Qirg‘iziston prezidenti Sadir Japarov bilan telefon orqali muloqot qildi.
Suhbat avvalida davlat rahbari Sadir Japarovni va qardosh qirg‘iz xalqini mamlakatning 2027–2028-yillarda BMT Xavfsizlik Kengashining doimiy bo‘lmagan a’zosi etib saylangani munosabati bilan samimiy tabrikladi.
Shavkat Mirziyoyev ushbu natija Qirg‘izistonning faol tashqi siyosati, shuningdek, mintaqaviy barqarorlik va xavfsizlikni ta’minlashga qo‘shayotgan hissasi xalqaro hamjamiyat tomonidan e’tirof etilganining yorqin ifodasi ekanini ta’kidlagan.
Davlat rahbarlari O‘zbekiston va Qirg‘iziston o‘rtasidagi do‘stlik, yaxshi qo‘shnichilik hamda strategik sheriklik munosabatlari yuksak darajaga ko‘tarilganini mamnuniyat bilan qayd etgan.
Shuningdek, oliy darajadagi uchrashuvlar davomida erishilgan kelishuvlar, xususan, iqtisodiyot, transport, energetika hamda madaniy-gumanitar sohalardagi loyihalarni amaliy jihatdan ilgari surish masalalari muhokama qilingan.
Suhbat yakunida tomonlar bo‘lajak oliy va yuqori darajadagi tadbirlar rejasini ham ko‘rib chiqdilar.
Avvalroq, Qirg‘iziston tarixda ilk bor BMT Xavfsizlik Kengashining doimiy bo‘lmagan a’zosi bo'lgani xabar qilingan edi.
