Shavkat Mirziyoyev amaliy tashrif bilan Sankt-Peterburgga bordi
O‘zbekiston Prezidenti Rossiya Prezidenti Vladimir Putin bilan muzokaralar o‘tkazadi.
Prezident Shavkat Mirziyoyev amaliy tashrif bilan Sankt-Peterburg shahriga bordi.
“Pulkovo” xalqaro aeroportida oliy martabali mehmonni Rossiya Hukumati Raisining birinchi o‘rinbosari Denis Manturov, Sankt-Peterburg shahri gubernatori Aleksandr Beglov hamda boshqa rasmiylar kutib oldi.
Tashrif dasturiga muvofiq, O‘zbekiston Prezidenti bugun Vladimir Putin bilan uchrashuv o‘tkazadi. Muzokaralar davomida ikki tomonlama hamkorlikning dolzarb yo‘nalishlari muhokama qilinishi kutilmoqda.
Shuningdek, davlat rahbari O‘zbekistonda birinchi integratsiyalashgan atom elektr stansiyasi reaktorining qurilishini boshlash marosimida ishtirok etadi.
5-iyun kuni Shavkat Mirziyoyev 29-Peterburg xalqaro iqtisodiy forumining asosiy tadbirlarida ham qatnashishi rejalashtirilgan.
