Sankt-Peterburgda Shavkat Mirziyoyev va Vladimir Putin uchrashuvi bo‘lib o‘tdi
Joriy yil boshidan buyon O‘zbekiston va Rossiya o‘rtasidagi tovar ayirboshlash hajmi 20 foizga oshgani qayd etildi.
Sankt-Peterburg shahriga amalga oshirilgan amaliy tashrif doirasida Shavkat Mirziyoyev Rossiya Prezidenti Vladimir Putin bilan uchrashuv o‘tkazdi.
Muloqot chog‘ida O‘zbekiston va Rossiya o‘rtasidagi keng qamrovli strategik sheriklik hamda ittifoqchilik munosabatlarini yanada rivojlantirish masalalari muhokama qilindi.
Tomonlar savdo-iqtisodiy hamkorlik izchil rivojlanib borayotganini mamnuniyat bilan qayd etdilar. Joriy yil boshidan buyon o‘zaro tovar ayirboshlash hajmi qariyb 20 foizga oshgani ta’kidlandi.
Uchrashuvda sanoat, energetika, metallurgiya, transport, kimyo sanoati va iqtisodiyotning boshqa ustuvor tarmoqlarida amalga oshirilayotgan yirik qo‘shma loyihalarning borishi ko‘rib chiqildi. Savdo hajmlarining o‘sish sur’atlarini saqlab qolish, kooperatsiya loyihalarini jadallashtirish hamda hududlararo hamkorlikni yanada faollashtirish muhimligi qayd etildi.
Madaniy-gumanitar aloqalarni kengaytirish masalalariga ham alohida e’tibor qaratildi. Shu kunlarda Mariinskiy teatrida Georg Fridrix Gendelning “Tamerlano” operasi premyerasi bo‘lib o‘tgani hamda Ermitaj davlat muzeyida O‘zbekiston amaliy san’ati ko‘rgazmasi ochilgani ta’kidlandi.
Shuningdek, davlat rahbarlari yaqin istiqboldagi oliy va yuqori darajadagi tadbirlar rejasini ham muhokama qildilar.
