Biz Eronga qarshi yolg'iz qolishimiz mumkin — Netanyaxu

 

Isroil Bosh vaziri Benyamin Netanyaxu mamlakat Eron bilan yuzaga kelishi mumkin bo‘lgan qarama-qarshilikda AQSh ko‘magisiz harakat qilishiga to‘g‘ri kelishi ehtimolini istisno etmadi. Bu haqda The Jerusalem Post nashri xabar berdi.

 

Ma’lum qilinishicha, Netanyaxu ushbu masalani xavfsizlik kabineti yig‘ilishida ko‘targan. Uning ta’kidlashicha, Isroil barcha ehtimoliy ssenariylarga tayyor bo‘lishi kerak.

 

“Barcha oqibatlarga qaramay, zarurat tug‘ilsa, Amerika ko‘magisiz ham zarba berishimizga to‘g‘ri kelishi mumkin. Biz bunday vaziyatni istamaymiz, biroq bunga qodir ekanligimizni bilamiz”, — degan Netanyaxu.

 

Nashrlar yozishicha, Isroilda Donald Trampning Eron bilan diplomatik kelishuvga erishish istagi sabab xavotir kuchaymoqda. Xususan, yaqinda Eron tomonidan amalga oshirilgan raketa hujumidan so‘ng Tramp Netanyaxu bilan telefon orqali muloqot qilgan va Isroilni vazminlikka chaqirgan.

 

The Jerusalem Post ma’lumotiga ko‘ra, Isroil dastlab Eron hududidagi bir qator nishonlarga keng ko‘lamli harbiy zarba berishni rejalashtirgan. Rejada o‘nlab jangovar samolyotlarni jalb qilish va turli strategik obyektlarga hujum uyushtirish ko‘zda tutilgan edi.

 

Biroq AQSh prezidenti Tehron bilan diplomatik kelishuv imkoniyatlari saqlanib qolayotganini bildirganidan so‘ng, mazkur reja qayta ko‘rib chiqilgan. Natijada Isroil tomonidan radar tizimlari, havo hujumidan mudofaa vositalari, qurol ishlab chiqarish korxonalari va ayrim sanoat obyektlariga cheklangan zarbalar berilgan.

 

Xabarlarga ko‘ra, Isroil harbiy-siyosiy rahbariyati AQSh va Eron o‘rtasida yangi kelishuv imzolanishi ehtimoliga ehtiyotkorlik bilan yondashmoqda. Isroil Mudofaa kuchlari Bosh shtabi boshlig‘i Eyal Zamir hukumat yig‘ilishida Tehron bilan tuzilishi mumkin bo‘lgan deyarli har qanday kelishuvni mamlakat manfaatlariga mos kelmaydigan kelishuv sifatida baholagan.

 

Shuningdek, i24News nashrining qayd etishicha, Netanyaxu Isroil Eron bilan qarama-qarshilik chuqurlashgan taqdirda o‘q-dorilar taqchilligi va xalqaro bosimning kuchayishi kabi xavflarga ham duch kelishi mumkinligini ta’kidlagan.

 

Eslatib o'tamiz, AQSh prezidenti navbatdagi hujumlar sodir bo‘lsa, Vashington Tel-Avivni qo‘llab-quvvatlash masalasini qayta ko‘rib chiqishi mumkinligini ma'lum qilgan edi.