Eron Hormuz bo'g'ozini yopdi
Cheklovlar barcha turdagi jumladan, neft tankerlari va savdo kemalari uchun amal qiladi.
Eron AQShning so‘nggi harbiy zarbalaridan so‘ng Hormuz bo‘g‘ozini barcha turdagi kemalar harakati uchun yopganini ma’lum qildi. Bu haqda Tasnim xabar berdi.
Eron Qurolli kuchlari markaziy qo‘mondonligi tarqatgan bayonotga ko‘ra, mintaqadagi keskin vaziyat hamda AQShning harbiy harakatlari sababli strategik ahamiyatga ega bo‘lgan Hormuz bo‘g‘ozida harakatlanish vaqtincha cheklangan.
Rasmiy ma’lumotlarda qayd etilishicha, cheklovlar neft tankerlaridan tortib savdo kemalarigacha bo‘lgan barcha dengiz transport vositalariga tatbiq etiladi. Tehron mazkur qarorni AQShning Hormozgon viloyatidagi ayrim hududlarga bergan zarbalari bilan izohlagan.
Avvalroq AQSh Markaziy qo‘mondonligi (CENTCOM) Eron hududidagi bir qator nishonlarga zarbalar berilganini ma’lum qilgan edi. Vashington ushbu amaliyotlar o‘zini himoya qilish maqsadida amalga oshirilganini bildirgan.
Hormuz bo‘g‘ozi dunyodagi eng muhim dengiz transport yo‘laklaridan biri hisoblanadi. U orqali global neft va suyultirilgan gaz tashuvlarining katta qismi amalga oshiriladi. Avval ham Eron va AQSh o‘rtasidagi keskinliklar fonida bo‘g‘ozdagi harakatlar bir necha bor cheklangan edi.
