Rossiyada “Tolibon”ni tanqid qilganlik uchun birinchi marta jarima tayinlandi
19 yoshli yigit tomonidan qoldirilgan izoh sud tomonidan millatlararo adovatni qo‘zg‘atish sifatida baholangan.
Rossiyaning Rostov-na-Donu shahridagi Oktyabr tuman sudi “VKontakte” ijtimoiy tarmog‘ida “Tolibon” haqidagi post ostida qoldirilgan izoh sababli mahalliy fuqaroga ma’muriy javobgarlik doirasida jarima tayinladi. Bu haqda Meduza xabar berdi.
Qayd etilishicha, 19 yoshli Egor A. “VKontakte”dagi post ostida nafrat qo‘zg‘atish bilan bog‘liq izoh qoldirgan. Sud hujjatlarida qayd etilishicha, u Aerotex kompaniyasida ishlaydi.
“VKontakte”dagi postda “Tolibon Rossiyani granatalar, mayiz, koka-kola, gilamlar va paxta bilan to‘ldiradi” deb yozilgan bo‘lib, uning ostiga Egor A. “G‘orliklarning Rossiyada nima ishi bor?” mazmunida izoh yozgan. Izoh sud tomonidan millatlararo adovatni qo‘zg‘atish sifatida baholangan.
Sud qarorida ayblanuvchining yana migrantlarga oid ikki izohi ham ish materiallariga qo‘shilgani qayd etilgan.
Qayd etilishicha, Egor A. o‘z aybini tan olgan va pushaymonligini bildirgan. Sud unga 10 ming rubl miqdorida jarima tayinlagan.
Ma’lumot o‘rnida “Tolibon” 2021-yilda Afg‘onistonda hokimiyatga kelganidan so‘ng Rossiyada terroristik tashkilot sifatida taqiqlangan edi. 2025-yil aprel oyida esa Rossiya Oliy sudi “Tolibon”ni terroristik tashkilotlar ro‘yxatidan chiqarishga qaror qilgan.
