AQSHdan yana 24 nafar o‘zbekistonlik deportatsiya qilindi
Ular immigratsiya qoidalarini buzganlikda ayblangan.
AQSH immigratsiya qonunchiligini buzganlikda ayblanib deportatsiya qilingan 24 nafar O‘zbekiston fuqarosi charter reys orqali Toshkentga olib kelindi. Bu haqda Dunyo axborot agentligi xabar berdi.
Ma’lum qilinishicha, AQSHdan uchib kelgan maxsus charter reysi Toshkent xalqaro aeroportiga qo‘ngan.
Fuqarolarni vataniga qaytarish jarayoni O‘zbekiston va AQSHning vakolatli idoralari o‘rtasidagi muvofiqlashtirilgan hamkorlik asosida amalga oshirilgan. Hamkorlik doirasida shaxslarni identifikatsiya qilish, hujjatlarni rasmiylashtirish hamda ularning xavfsiz qaytishini ta’minlash bilan bog‘liq barcha tashkiliy-huquqiy masalalar tezkor tartibda hal etilgan.
Qayd etilishicha, O‘zbekiston migratsiya jarayonlarini tartibga solish, noqonuniy migratsiya holatlarining oldini olish hamda xorijda bo‘lib turgan fuqarolarning huquq va manfaatlarini himoya qilish yo‘nalishida xorijiy hamkorlar bilan muntazam hamkorlikni davom ettirmoqda.
Mutasaddilar fuqarolarni xorijga chiqishda qabul qiluvchi davlatlarning migratsiya va yashash qoidalariga qat’iy rioya etishga chaqirmoqda.
Eslatib o'tamiz, avvalroq AQSHda 4,5 million dollarlik tovarlarni o‘g‘irlashda gumonlangan, noqonuniy poyga uyushtirgan o‘zbekistonliklar qo‘lga olingani haqida xabar berilgan edi.
